Showing posts with label Travel Photography. Show all posts
Showing posts with label Travel Photography. Show all posts

Saturday, June 6, 2009

തിരുച്ചിയിലേക്കൊരു യാത്ര - ഭാഗം രണ്ട്

A trip to Trichy: A photo travelogue by Haree. (Thiruvaiyaru and Kallanai)
തഞ്ചാവൂര്‍ ബൃഹദീശ്വര ക്ഷേത്രത്തില്‍ നിന്നും തിരുവയ്യാര്‍ വഴിക്കാണ് തിരുച്ചിയിലേക്ക് മടങ്ങിയത്. ത്യാഗരാജസമാധി, കല്ലണ അണക്കെട്ട് എന്നിവ കാണുക എന്നതായിരുന്നു ഈ വഴി തിരഞ്ഞെടുക്കുവനുള്ള കാരണം. കാവേരിയുടെ സമാന്തരമായാണ് ഈ ചെറിയ പാത പോവുന്നത്. വേനല്‍ക്കാലമായതിനാല്‍ നിറഞ്ഞൊഴുകുന്ന കാവേരിക്കു പകരം വരണ്ടുണങ്ങിയ മണല്‍തിട്ടകള്‍ കണ്ടായിരുന്നു യാത്ര എന്നുമാത്രം. നദിയുടെ നടുവില്‍ നിന്നും വെള്ളമെടുക്കുന്നതിനായുള്ള പമ്പ് ഹൌസുകളും ഇടയ്ക്കിടെ കാണുവാനുണ്ട്. ചില സ്ഥലങ്ങളില്‍ മയിലുകളേയും കാണുവാന്‍ കഴിഞ്ഞു. ഉച്ചയ്ക്ക് മൂന്നരയോടെ തഞ്ചാവൂരില്‍ നിന്നും യാത്ര തിരിച്ച ഞങ്ങള്‍ നാലു മണിയോടെ തിരുവയ്യാറിലെത്തിച്ചേര്‍ന്നു.

 തിരുവയ്യാറ്‌

കര്‍ണാടക സംഗീതത്തിലെ ത്രിമൂര്‍ത്തികളില്‍ പ്രധാനിയായ ത്യാഗരാജസ്വാമികളുടെ സമാധിസ്ഥലമാണ് തിരുവയ്യാറില്‍ സന്ദര്‍ശിക്കുവാനുള്ളത്. മുറ്റത്തു നില്‍ക്കുന്ന ആലിന്റെ ഇലകള്‍ കാറ്റിലാടുന്ന ശബ്ദം മാത്രമാണ് അവിടെ കേള്‍ക്കുവാനുള്ളത്. കാവേരി നദിയോടു ചേര്‍ന്നു തന്നെയുള്ള മണല്‍തിട്ടയിലാണ് വര്‍ഷാവര്‍ഷം ത്യാഗരാജസംഗീതോത്സവം നടക്കുന്നത്. സമാധിയ്ക്ക് അഭിമുഖമായി സംഗീതാരാധന നടക്കുന്ന രണ്ട് സ്ഥിരം വേദികളും ഇവിടെ കാണുവാനുണ്ട്. സമാധിയുടെ ഉള്ളില്‍ നാലുചുവരിലും ത്യാഗരാജകൃതികള്‍ മാര്‍ബിള്‍ ഫലകങ്ങളില്‍ കൊത്തിവെച്ചിരിക്കുന്നതു കാണാം. മാര്‍ബിളില്‍ കൊത്തിയ ചില ശില്പങ്ങളും ഉള്ളിലായുണ്ട്.


 കല്ലണ

കാവേരി നദിക്കു കുറുകെയുള്ള കല്ലണ അണക്കെട്ട് (കല്ലണ എന്നാല്‍ തന്നെ കല്ലുകൊണ്ടുള്ള അണ എന്നാണ്, പിന്നെയൊരു അണക്കെട്ട് ആവശ്യമില്ലെങ്കിലും ഇപ്പോള്‍ കല്ലണ ഒരു പേരായി ഉപയോഗിക്കുന്നതിനാല്‍ അണക്കെട്ടെന്ന് ചേര്‍ക്കുന്നതില്‍ തെറ്റില്ല.) കാണുവാനായാണ് പിന്നീടു പോയത്. കരികാല ചോള എന്ന രാജാവിന്റെ കാലത്താണ് ഈ അണക്കെട്ട് പണിതുയര്‍ത്തിയത്. പൂര്‍ണ്ണമായും കല്ലുകെട്ടി നിര്‍മ്മിച്ചിരിക്കുന്ന ഈ അണക്കെട്ടിന് മുന്നൂറ്റി ഇരുപത്തിയൊന്‍പത് മീറ്റര്‍ പൊക്കവും ഇരുപതു മീറ്റര്‍ വീതിയുമാണുള്ളത്. കാവേരി നദിയില്‍ നിന്നും, കാര്‍ഷികാവശ്യങ്ങള്‍ക്കായി, അഞ്ച് കനാലുകളിലേക്ക് വെള്ളം തിരിച്ചുവിടുക എന്ന ധര്‍മ്മമാണ് ഈ അണക്കെട്ടിനുള്ളത്. കൃസ്തുവിന് മുന്‍പ് രണ്ടാം നൂറ്റാണ്ടില്‍ തീര്‍ത്ത ഈ അണക്കെട്ട്, ജലസേചനത്തിനായി ഉപയോഗിക്കുന്ന അണക്കെട്ടുകളില്‍ ലോകത്തിലെ തന്നെ പഴക്കം ചെന്നവയില്‍ പ്രധാനപ്പെട്ട ഒന്നാണ്. കല്ലണ കെട്ടിയ കരികാല ചോളന്റെയും, കാവേരി അമ്മ(കാവേരി തായ്)യുടേയും ശില്പങ്ങളും ഒരു ഭാഗത്ത് കാണാം. വേനല്‍ക്കാലത്ത് അണക്കെട്ടിനുള്ളില്‍ ഇറങ്ങി ചെറിയ നീരരുവികളില്‍ കാല്‍ നനയ്ക്കാം, മഴക്കാലമായാല്‍ സമീപപ്രദേശങ്ങള്‍ പോലും വെള്ളത്തിനടിയിലുമാവും.


അമ്പലങ്ങള്‍ മാത്രം തുടര്‍ച്ചയായി കണ്ടാല്‍ ആര്‍ക്കും മടുപ്പു തോന്നും. ഇനി തിരുച്ചിയില്‍ കാണുവാനുള്ളതാവട്ടെ റോക്ക് ഫോര്‍ട്ടും അതിനോടനുബന്ധിച്ചുള്ള ഉച്ചൈപിള്ളയാര്‍ കോവിലും മാത്രവും. (പിന്നെയും അമ്പലങ്ങള്‍ ധാരാളമുണ്ട്, ഏറ്റവും പ്രധാനം ഇവിടമാണ്.) അതിനാല്‍ അടുത്ത ദിവസം കൊടൈക്കനാല്‍ വരെ പോയി വരാം എന്നു തീരുമാനിച്ചു. തിരുച്ചിയില്‍ നിന്നും ഏതാണ്ട് ഇരുനൂറു കിലോമീറ്ററോളം യാത്ര ചെയ്യണം കൊടൈക്കനാലിലെത്തുവാന്‍. കൊടൈക്കനാല്‍ വിശേഷങ്ങള്‍ അടുത്ത പോസ്റ്റില്‍.

അനുബന്ധം:
1. Thiruvaiyaru - Wikipedia
2. Tyāgarāja - Wikipedia
3. Grand Anicut (Kallanai) - Wikipedia

Description: A trip to Trichy (Thiruchi, Thiruchirappally, Thiruchirapalli) - A Travelogue. First day: SreeRanganathaSwamy Temple, Sreerangam: Sculpture, Interior, Corridor, Towers; Second day: Thanjavur Brahideeswara Temple: Towers, Main Shrine, Nandiswaran, Sculpture, Shrine of Subrahmanian, Corridor, Temple Courtyard; Thiruvaiyaru: Saint Thyagaraja Samadhi, Kaveri River, Thayagaraja Sangeetholsavam (Music Festival); Kallana Dam: Built by Karikala Chola, Statue of Karikala Chola, Statue of Kaveri Thai; Third Day: Amsapuram, Silver Cascade Falls, KodaiKanal, Coker's Walk, Bryant Park, Botanical Garden, Forth Day: Rock Fort Temple. A travelogue by Hareesh N. Nampoothiri aka Haree | ഹരീ for Grahanam Blog. May 2009. Photography by Haree and Sree.
--

Sunday, May 24, 2009

തിരുച്ചിയിലേക്കൊരു യാത്ര - ഭാഗം ഒന്ന്

A trip to Trichy - A photo travelogue by Haree.
യാത്രകള്‍ ഇഷ്ടമാണെങ്കിലും പലപ്പോഴും സമയവും സാഹചര്യവും ഒത്തുവരാറില്ല. അങ്ങിനെയിരിക്കെയാണ് കഴിഞ്ഞ വാരം തിരുച്ചിറപ്പള്ളി അഥവാ തിരുച്ചി(Trichy)യിലേക്കൊരു യാത്ര സാധ്യമായത്. കൂട്ടത്തില്‍ ശ്രീരംഗം, തഞ്ചാവൂര്‍, തിരുവയ്യാറ്‌, കല്ലണ, കൊടൈക്കനാല്‍ തുടങ്ങിയ ഇടങ്ങളും സന്ദര്‍ശിക്കുവാന്‍ കഴിഞ്ഞു. തമിഴ്‌നാട്ടിലെ പട്ടണങ്ങളില്‍ വലുപ്പത്തിന്റെ കാര്യത്തില്‍ നാലാം സ്ഥാനമാണ് തിരുച്ചിക്കുള്ളത്. കാവേരി നദിയുടെ ഓരത്തോടു ചേര്‍ന്നു കിടക്കുന്നതിനാല്‍ തന്നെ, തമിഴ്‌നാട്ടിലെ മറ്റു പ്രദേശങ്ങളെ അപേക്ഷിച്ച് കൂടുതല്‍ പച്ചപ്പുനിറഞ്ഞ ഭൂപ്രദേശമാണ് ഇവിടുത്തേത്. ചൂടും അല്പം കുറവുണ്ട്. എറണാകുളത്തു നിന്നുമുള്ള 6866 നമ്പര്‍ തിരുച്ചി എക്സ്‌പ്രസിലായിരുന്നു അങ്ങോട്ടുള്ള യാത്ര. ഒരു മണിക്കൂറോളം വൈകി തിരുച്ചി ഫോര്‍ട്ട് റയില്‍‌വേസ്റ്റേഷനില്‍ ഇറങ്ങുമ്പോള്‍ സമയം രാവിലെ ഒന്‍പത് മണി.

 ശ്രീരംഗനാഥസ്വാമി ക്ഷേത്രം

ഭക്ഷണവും വിശ്രമവുമൊക്കെ കഴിഞ്ഞ് വൈകുന്നേരം ഏറ്റവും അടുത്തുള്ള ശ്രീരംഗനാഥസ്വാമി ക്ഷേത്രം കാണുവാനായി തിരിച്ചു. ലോകത്താകമാനമുള്ള പ്രവര്‍ത്തനക്ഷമമായ ഹൈന്ദവക്ഷേത്രങ്ങളെടുത്താല്‍ ഏറ്റവും വലുപ്പം ഈ വൈഷ്ണവ ക്ഷേത്രത്തിനത്രേ! ശ്രീകോവിലിനെ ചുറ്റി ഏഴു മതിലുകളാണ് ഈ ക്ഷേത്രത്തിനുള്ളത്. ഇതില്‍ ആദ്യ അഞ്ചു മതിലുകള്‍ക്കും നാലുവശവും ഗോപുരങ്ങളുണ്ട്. ഉള്ളില്‍ നിന്നും രണ്ടാമത്തേതിന് ഒരു ഗോപുരം, പിന്നീട് ശ്രീകോവിലിന്റെ പുറംഭിത്തി, അതിനു ഗോപുരങ്ങളില്ല. അങ്ങിനെ ഇരുപത്തിയൊന്നു ഗോപുരങ്ങളുള്ള ഈ ക്ഷേത്രസമുച്ചയത്തില്‍, ഏറ്റവും പുറത്തുള്ള മതില്‍കെട്ടിന്റെ മുന്‍ഭാഗമുള്ള ഗോപുരമാണ് ഏറ്റവും വലുത്. മൂന്നു മതില്‍ക്കെട്ടുവരെ വാഹനങ്ങള്‍ക്കു വരെ പ്രവേശനമുള്ള സാധാരണ നിരത്തുകളാണ്. നാലാമത്തേതു മുതലാണ് ക്ഷേത്രത്തിന്റേതെന്നു പറയാവുന്ന അന്തരീക്ഷമുള്ളത്.


 തഞ്ചാവൂര്‍ ബൃഹദീശ്വര ക്ഷേത്രം

രണ്ടാം ദിവസം പുലര്‍ച്ചെ പ്രസിദ്ധമായ തഞ്ചാവൂര്‍ ബൃഹദീശ്വര ക്ഷേത്രത്തിലേക്ക് യാത്രയാരംഭിച്ചു. ഏതാണ്ട് അന്‍പത്തിനാല് കിലോമീറ്ററോളം ദൂരമുണ്ട് തിരുച്ചിയില്‍ നിന്നും തഞ്ചാവൂരിലെത്തുവാന്‍. 985 മുതല്‍ 1014 വരെ തമിഴ്‌നാട് ഉള്‍പ്പെടുന്ന ചോളസാമ്രാജ്യം ഭരിച്ച രാജരാജ ചോളനാണ് ഈ ക്ഷേത്രം നിര്‍മ്മിക്കുവാന്‍ ഉത്തരവിട്ടത്. ഇത്രയും ബ്രഹൃത്തായ ഒരു ക്ഷേത്രസമുച്ചയം പൂര്‍ണമായും കല്ലില്‍ നിര്‍മ്മിച്ചെടുക്കുക അത്ര എളുപ്പമായിരുന്നില്ല. എന്നാല്‍ തന്റെ ശക്തിയും പ്രതാപവും വെളിവാക്കുക എന്നൊരു ലക്ഷ്യത്തിനുവേണ്ടി രാജരാജ ചോളന്‍ തന്റെ തീരുമാനത്തില്‍ ഉറച്ചു നിന്നു. കഠിനമായ ശിക്ഷാവിധികളോടെ, നിര്‍ബന്ധപൂര്‍വ്വം പണിയെടുപ്പിച്ച് ധാരാളം പേരെ കുരുതി നല്‍കിയാണ് ക്ഷേത്രം പൂര്‍ത്തിയാക്കിയത്. അതിനാല്‍ തന്നെ ഇവിടെ പ്രാര്‍ത്ഥന ചെയ്താല്‍ ഫലപ്രാപ്തിയുണ്ടാവുകയില്ല എന്നൊരു വിശ്വാസവും പ്രബലമായുണ്ട്. ഇപ്രകാരമുള്ള അമ്പലത്തിന്റെ ദോഷങ്ങള്‍ മാറുവാനായി രാജരാജ ചോളന്‍ പ്രതിഷ്ഠിച്ച ആയിരത്തിയെട്ട് ശിവലിംഗങ്ങള്‍ ക്ഷേത്രത്തിന്റെ ചുറ്റുമതിലിനോടു ചേര്‍ന്നുള്ള ഇടനാഴികളില്‍ കാണാം.


ഒറ്റക്കല്ലില്‍ തീര്‍ത്ത നിരവധി വലിയ കെട്ടുകള്‍ ക്ഷേത്രത്തില്‍ സുലഭമായി കാണാം. രണ്ട് കവാടങ്ങള്‍ പിന്നിട്ടുവേണം പ്രധാന അങ്കണത്തിലെത്തുവാന്‍. പ്രതിഷ്ഠയായ ശിവനെ അഭിമുഖീകരിച്ചിരിക്കുന്ന നന്ദികേശ്വരന്റെ ഒറ്റക്കല്ലില്‍ കൊത്തിയ ശില്പമാണ് ആദ്യം കണ്ണില്‍‌പെടുക. മേല്‍ക്കൂരയില്‍ ചിത്രപ്പണികളോടു കൂടിയ ഒരു കല്‍‌മണ്ഡപത്തിലാണ് നന്ദികേശ്വരനെ പ്രതിഷ്ഠിച്ചിരിക്കുന്നത്. ഏതാണ്ട് 70 മീറ്ററോളം പൊക്കമുണ്ട് പ്രധാന ശ്രീകോവിലിന്റെ താഴികക്കുടം സ്ഥിതി ചെയ്യുന്ന ഗോപുരത്തിന്. ഉള്ളിലെ ശിവന്റെ പ്രതിഷ്ഠയുടെ വലിപ്പവും വിസ്മയിപ്പിക്കുന്നതാണ്.


പ്രധാന ശ്രീകോവിലിനു ചുറ്റും വിശാലമായ നടപ്പാത കാണാവുന്നതാണ്. കരിങ്കല്‍ പാളികളാലാണ് നടപ്പാതയുടെ തറ പാകിയിരിക്കുന്നത്. വെയില്‍ കഠിനമാവുമ്പോള്‍ ചുട്ടുപഴുത്തുകിടക്കുന്ന ഇവയില്‍ ചവുട്ടി നടക്കുക ദുഷ്‌കരമാണ്. പുറം ചുമരിനോട് ചേര്‍ന്ന് പൂര്‍ണമായും കല്ലില്‍ തീര്‍ത്ത ഇടനാഴിയും കാണാം. ഈ ഇടനാഴികളിലാണ് ശിവലിംഗങ്ങള്‍ പ്രതിഷ്ഠിച്ചിരിക്കുന്നത്. ചുവരുകളില്‍ ചുവര്‍ച്ചിത്രങ്ങള്‍ അലേഖനം ചെയ്തിട്ടുമുണ്ട്. പ്രധാന ശ്രീകോവിലിന്റെ വശത്തായി ദക്ഷിണാമൂര്‍ത്തിയേയും, പ്രത്യേകം കോവിലുകളില്‍ ഗണപതി, സുബ്രഹ്മണ്യന്‍, രാജരാജേശ്വരി എന്നിവരേയും പ്രതിഷ്ഠിച്ചിരിക്കുന്നു.



തഞ്ചാവൂര്‍ ക്ഷേത്രദര്‍ശനത്തിനു ശേഷം അടുത്തൊരു ഹോട്ടലില്‍ നിന്നും ഉച്ചഭക്ഷണവും കഴിച്ച് നേരേ പോയത് തിരുവയ്യാറിലേക്കാണ്. ത്യാഗരാജസംഗീതോത്സവത്തിലൂടെ ഇവിടം ലോകപ്രശസ്തമാണ്. തുടര്‍ന്നുള്ള യാത്രയുടെ വിശേഷങ്ങള്‍ അടുത്ത പോസ്റ്റില്‍.

അനുബന്ധം:
1. Thiruchirapalli - Wikipedia
2. Sri Ranganathaswamy Temple (Srirangam) - Wikipedia
3. Thanjavur - Wikipedia
4. Brihadeeswarar Temple - Wikipedia

Description: A trip to Trichy (Thiruchi, Thiruchirappally, Thiruchirapalli) - A Travelogue. First day: SreeRanganathaSwamy Temple, Sreerangam: Sculpture, Interior, Corridor, Towers; Second day: Thanjavur Brahideeswara Temple: Towers, Main Shrine, Nandiswaran, Sculpture, Shrine of Subrahmanian, Corridor, Temple Courtyard; Thiruvaiyaru, Kallana Dam; Third Day: Amsapuram, Silver Cascade Falls, KodaiKanal, Coker's Walk, Bryant Park, Botanical Garden, Forth Day: Rock Fort Temple. A travelogue by Hareesh N. Nampoothiri aka Haree | ഹരീ for Grahanam Blog. May 2009. Photography by Haree and Sree.
--