തണല്‍

ദൂരെയൊരു തണല്‍,
അടിയില്‍ കുളിര്‍മ്മ,
വറ്റാത്ത ഉറവകള്‍,
സ്നേഹത്തിന്റെ പച്ചപ്പുകളില്‍
ഹൃദയം പങ്കുവെയ്ക്കുന്നവര്‍,
മടിയിലെ ചൂടില്‍
തലചായ്ച് കിടക്കുമ്പോള്‍
മുകളില്‍ ചിരിക്കുന്ന
പാതിരാപ്പൂവുകള്‍.

ചുവന്ന ആകാശം,
താഴെ നീലക്കടല്‍,
കൊലുസിട്ട പാദങ്ങള്‍,
മണ്ണിനെപ്പുല്‍കി
പാവാടത്തലപ്പ്,
നുരഞ്ഞുവരുന്ന
തണുപ്പില്‍ പുതയുന്ന
കാല്‍ വെള്ളയില്‍
തിളങ്ങുന്ന മണല്‍ത്തരികള്‍.

വീശുന്ന ഇളം കാറ്റ്,
കാറ്റില്‍ പാറുന്ന മുടി,
ഇഴകളില്‍ നീലാകാശം,
ചുവന്ന റിബണില്‍
കുരുങ്ങിയ അരളിപ്പുവുകള്‍,
അലഞ്ഞുവരുന്ന
കുളിരില്‍ ചുരുങ്ങുന്ന
മനസിന്റെ ചുവരുകളില്‍
സ്നേഹത്തിന്റെ ഉറവകള്‍.

ആദ്യത്തെ ചാറ്റല്‍ മഴ,
പതിയെപ്പൊങ്ങുന്ന പൊടി,
അങ്ങേയറ്റത്തൊരു മഴവില്ല്,
മുഖത്തെപുള്ളികളില്‍
തട്ടിത്തെറിക്കുന്ന തുള്ളികള്‍,
മാറത്തുപിണയുന്ന
കൈകളുടെ തണുപ്പില്‍
അലിഞ്ഞില്ലാതാവുന്ന
ഞാനുമെന്റെ മനസും.
--